SARANGANI PROVINCE– Gidayig og gi-congratulate ni PCOO kon Presidential Communications Operations Office Assistant Secretary Ramon Cualoping III ang pamunuan ni Governor Steve Chiongbian Solon tungod wala mukuyanap ang ilegal nga druga sa Sarangani Province.
Sa media interview kang Asec Cualoping atol sa natigayon nga PCOO Roadshow niaging adlaw nga Byernes sa SM Mall sa Gensan kauban ang PIA/Philippine Information Agency, iyang gitimbaya si Governor Solon tungod matud pa sa maayong record, wala matud pa nasulod ang Sarangani Province sa Top 10 entiro Pilipinas nga may labing taas nga nagpayuhot sa ginadiling druga.
Si Cualoping nga taga-Davao ang assistant secretary sa PCOO ilalum sa buhatan ni PCOO Secretary Martin Andanar og maoy nakatutok sa programa ni Pangulong Rodrigo Duterte gitawag nga “Rehabinasyon” isip assistant secretary for the office of brand integration. Rehabinasyon, kumbinasyon sa mga pulong nga rehabilitasyon og nasyon, pag-rehab sa nasud pinaagi sa pagtabang nga matagaan og paglaum ang buot nang mabag-o sa ilang kaugalingon human nagumon sa ilegal nga druga.
Nanghinaot na lamang kini nga magpadayon ang mga kalihukan aron hingpit ng mahimong drug-free, sa tabang sa mga local anti-drug abuse council gikan sa probinsya, munisipyo, hangtud na sa barangay, sa PADAC, MADAC og BADAC, og sa PNP-AFP. Aminado kini nga dili magpabilin nga drug-cleared ang usa ka lugar kung aduna pay mubalik sa paggamit.
Una ng gibutyag ni PDEA Sarangani-Gensan Provincial Officer Jerome Valentos sa nahitabo nga labing ulahi nga joint meeting sa PPOC-PADAC kon Provincial Peace and Order Council og Provincial Anti-Drug Abuse Council ato lang bulan sa Hunyo, nga nikunhod ang nagagamitan og nagabaligya sa gidiling druga sa tibuok Sarangani Province itandi matud pa kaniadto nga muabot sa napulo (10) katao ang ilang madakpan matag semana. Gikan Enero karong tuiga, may siyam (9) kabuok lang buy-bust operation ang ilang napatuman.
Sa kalampusan sa drug program, kauban ang pito (7) ka mga mayor, gusto karon ni Assistant Secretary Cualoping nga makig-partner ang PCOO sa lokal nga panggamhanan sa Sarangani dili lang sa hisgutanang druga kundili sa uban pang mga programa sa Duterte Administration aron ma-promotar pa ang mga programa og inisyatibo, hilabi na matud pa ang padayon nga pagpasabot sa mga katawhan sa saktong impormasyon sa pagpadagan sa gobyerno.
Nagpasalamat ng daan si Governor Solon atong gadulong ang pagtapos sa tuig 2018 nakalabay nga bulan sa Disyembre tungod kay personal niining gidawat sa kauluhang Maynila ang award nga gihatag ni DILG Secretary Eduardo Año atol sa pinaka-una nga National Anti-Drug Abuse Council Performance Award, nag-ila sa maayong performance sa PADAC kon Provincial Anti-Drug Abuse Council sa Sarangani. Baynte-uno (21) ka probinsya lang ang natagaan sa maong pasidungog taliwala nga adunay otsyentay-uno (81) ka probinsya ang Pilipinas.
Anaa usab sa maong PCOO Roadshow atong Byernes sila Presidential Task Force on Media Security Executive Director PCOO Undersecretary Joel Egco og PCOO Assistant Secretary and Freedom of Information/FOI Program Director Atty. Kristian Ablan nga naghisgot sa proteksyon sa mga media practitioners, og ang transparency sa matag opisina sa gobyerno.
(Photo Credit to the Owner)
