Midonar ug 1 ka milyon ka pesos ang Philippine Charity Sweepstakes Office sa Probinsya sa Bukidnon alang sa dugang pundo aron magamit para sa COVID-19.
Personal nga mibisita sa buhatan ni Bukidnon Provincial Governor Jose Ma. R. Zubiri, Jr. si PCSO Bukidnon Branch Manager Mr. Mario S. Pelisco aron itunol ang check deposit slip nga gideposit gikan sa PCSO Mandaluyong Branch ngadto sa Provincial Government of Bukidnon pinaagi sa Landbank of the Philippines.
Basi sa memorandum of agreement tali sa PCSO ug BPMC nga mao ang Bukidnon Provincial COVID-19 Center sa probinsya, ang maong pundo ihatag ngadto sa BPMC isip calamity assistance aron matabangan ang probinsysa sa pagsumpo sa COVID-19 diin ang atong nasod nagdeklara ug public health emergency.
Kini basi usab sa Proclamation No. 922 ni Presidente Rodrigo Roa Duterte nga nagdeklara ug State of Public Health Emergency sa tibouk nasod ug Proclamation No. 929 nga nagdeklara sa State of Calamity gumikan sa Corona Virus Disease-2019 nga nagmando sa mga Local Government Units sa paghatag ug kinatibuk-ang assistance ug kooperasyon aron matabangan nga masumpo ang maong pandemya.
Lakip nga gipirmahan ni Presidente Duterte ang Republic Act 11469 nga Bayanihan We Heal As One Act nga nagmando sa mga Gov’t Owned and Controlled Corporation lakip na niini ang PCSO nga motabang sa pagpangita ug pundo aron mapunduhan ang mga kalihukan sa gobyerno batok sa COVID-19.
Isip pagtuman sa direktiba sa Presidente, ang PCSO pinaagi sa ilang Board of Directors, nagpasa ug Resolution No. 0100 ug Resolution No. 0100-Anga nag-aproba sa paghatag ug calamity assistance sa mga hospital nga kuwaon gikan Charity Fund.
Ang maong kwarta pagagamiton sa pagpalit ug mga testing kits, reagents; medical/diagnostic equipment, Personal Protective Equipment (PPE); ug mga medisina nga gamiton para sa mga biktima sa COVID-19 ug gamiton usab para sa galastuhon sa laboratory/diagnostic procedures ug confinement of COVID-19 cases.
