Indi na pag-idayon sang Provincial Disaster Risk Reduction and Management Council South Cotabato ang rekomendasyon nga ipaidalom ang probinsya sa state of calamity tungod sa natuga nga danyos sang magkasunod nga linog.
May-angot sini, ginpahold na lamang sa mga katapo sang Sangguniang Panlalawigan ang pagtalakay sa nasambit nga rekomendasyon kahapon nga adlaw.
Suno kay PDRRMO Operations and Warning Division Chief Rolly Aquino ang ginhimo na lamang nila ang pag-realign sang pondo sang 2018 disaster fund nga nagakantidad sang P26 million.
Magakadto naman ang P2 million para sa ihatag nga ayuda sang provincial government sa mga apektado sang linog sa North Cotabato kag subong man sa mga nadanyos sang linog nga mga school building kag pipila pa ka kinahanglanon sa disaster preparedness sa probinsya.
Nahibaluan nga wala naaprobahan sang mga Sangguniang Panlalawigan sa ginpatigayon nila nga special session sang Biyernes nga adlaw ang rekomendasyon sang PDRRMC nga pagpaidalom sa probinsya sa state of calamity tungod sa kakulangan sang datos nga ginsubmitir sang PDRRMO sa natuga nga danyos sang linog sa probinsya.
Samtang suno kay Aquino tigayon naman nga nakahatag sang inisyal nga ayuda ang provincial government sa mga apektado sang linog sa Tulunan kag Brgy. Luna Sur sa banwa sang Makilala, North Cotabato paagi sa natipon nga mga donasyon.
