Ginahangkat ni Provincial Disaster Risk Reduction and Management Warning and Operations Division Chief Rolly Aquino ang mga pumuluyo nga indi magpadala-dala ukon magpanic sa mga nagalapta nga impormasyon sa social media kag text messages nga may mag-igo pa nga magnitude 8 dire sa Mindanao gamit ang logo sang NDRRMC tungod wala suno pa sang kamatuoran kag wala sang ginpaggwa nga impormasyon ang talatapan.
Ginhatagan punto ni Aquino nga wala sang makapredict sang linog kon san-o mag-abot kag kon ano kakusog.
Apang ang advice niya sa katawhan nga magpreparar lang sa tanan nga oras ilabi na nga mabatyagan sa gihapon nga aftershocks matapos ang intensity 5 nga nagtay-og sang Dominggo sang hapon nga ang sentro dire sa syudad sang Koronadal tungod wala ini sang kahilabtanan sa 6.3 magnitutide nga linog sa Tulunan, North Cotabato sang Oktubre 16 sang gab-i.
Ginpahayag niya man nga may gin-establisar ang PHIVOLCS nga intensity meter sa Koronadal, Tupi kag T`boli nga hugot nila nga ginamonitor suno pa.
Samtang ginpahayag ni Aquino nga liwat niya nga ginpaassess ang mga building sa RDANA team tungod sa intensity 5 nga pag-uyog dire sa Koronadal sang Dominggo sang hapon.
Ginarekomendar niya man ang pagpatigayon sang earthquake drill sa mga mall nga may-yara na sang customer ang mga ini matapos nga naglab-ot sa 29 ang nakaangkon sang minor injuries kag naghyperventilate tungod sa panic.
