BACOLOD CITY – Kapin sa 300 ka mga kandidato sa Barangay Elections sa Bacolod, nagpirma sang peace covenant kahapon sa Bacolod Arts Center sa sulod sang Bacolod City National High School.
Suno kay city election officer – Atty. Mavil Majarucon Sia nga ila ginpatigayon ang signing sang peace covenant kaupod sang PNP agud mag-serbe nga reminder sa mga kandidato para sa matinlo, ‘honest’ kag malinong nga pinili-ay.
Dugang pa ni Majarucon-Sia nga dapat mangin kalmado kag likawan sang mga kandidatu ang paghimo sang negatibo nga butang angut sa eleksyon bangud nga ang pinili-ay ang isa gid lamang ka adlaw.
Sa pihak nga bahin, handa na ang Bacolod City Police Office nga magpatuman sang full force nga seguridad kag contingency plans para sa palaabuton nga May 14 Barangay kag Sangguniang Kabataan elections.
Ginpahayag nga iga-assign ang mga police officers sa 45 tanan ka mga polling centers sa ciudad sang Bacolod kag sa gwa sang mga voting centers subong man sa mga vital installations, kabahin sang police visibility sang BCPO./dyHB BACOLOD
