BACOLOD CITY – Gindakup sang mga katapo sang National Bureau of Investigation (NBI) kahapon ang isa ka babayi nga nagpakuno kuno nga doktor.
Ginpahayag ni NBI Bacolod Agent in-charge Renoir Baldovino nga gindakup nila ang suspek nga si Michaela Temporosa, 39 anyos sang For Lilfe Research Philippines matapos ini ang ginreklamo sang iya anay business partner kag investor nga si Analyn Ordaniel. Si Temporosa ang pomoloyo sang Doña Juliana Subdivision, Bacolod City.
Pinaagi sa entrapment operations, gindakup si Temporosa nga nag issue sang riseta sang bulong sa mga ahente sang NBI nga nagpakuno kuno nga pasyente.
Gilayon nga gin inquest ang kaso nga violation sang Medical Act of 1965 nga ginpasaka batuk sa suspek matapos nga nag issue man sang certification ang Philippines Regulations Commission nga wala sa listahan sang mga doktor si Temporosa.
Sa karon, temporaryo nga nakahilway ang suspek matapos ini ang post sang bail.
