PEOPLE POWER I | Ika-33 anyos nga anibersaryo sang EDSA Uno, ginahanduraw subong nga adlaw!

26

Roxas City – Subong nga adlaw atun nga ginahanduraw ang ika-33 na nga anyos sang pagselebrar sang People Power Revolution ukon mas kilala sang kadam-an bilang Edsa Uno nga natabu sa Epifanio de los Santos Avenue sadtung Pebrero 22 tubtub 25 sang tuig 1986.
Ini amu ang ginahambal gani sang kadam-an nga isa ka sahe sang malinong nga demonstrasyon nga nagdugay sang apat ka adlaw kaupod ang mga nanari-sari nga personalidad, alagad sang simbahan, militar kag ang simple nga Pilipino sa diin luyag nga liwat maangkon ang demokrasya sa Pilipinas.
Nag-ugat ang nasambitan nga rebolusyon sa serye sang mga hublag protesta sang mga grupo sang tawo nga kontra sa diktaturya nga pagpamuno sadto ni anay Presidente Ferdinand Edraline Marcos, labe na sang tiun nga gin-asasinar ang ginakabig numero uno nga kritiko sini nga si Ninoy Aquino sadtung 1983.
EDSA Uno…Sa diin gintangla ang Pilipinas sang bug-os nga kalibutan. Mga bulak, rosarito, pangamuyo, ambahanon kag ang paghiliusa amu ang nangin panaming sang mga Pilipino nga nagtilipon sa dalanun sang EDSA.
Manggaranun man ukon imol, ginhugpong sang naga-isahanon nga tinutuyo nga amo ang liwat nga mabalik ang matuod nga kahulogan sang demokrasya sa Pilipinas kadungan sang singgitan nga “Sobra na! Tama na! Palitan na!”.
Madamo man nga grupo ang nagkanta Sang “Bayan Ko”, nga umpisa sang 1980, ini na ang nangin ambahanon sang mga oposisyon. Madamu man sang mga tawo ang naggamit sang LABAN sign.

Facebook Comments