Davao City – Personal nga bangi ang gilantaw karong motibo sa kapulisan sa pagpusil patay sa kanhi iladong transport leader sa Davao City nga gipusil mag alas-6 sa hapon niadtong Miyerkules, October 9, 2019 sa Sitio Tibungoy, Sta. Maria Davao Occidental.
Sa interbyu sa DXDC RMN Davao kang PMaj. Elinar Agustin sa Sta. Maria Municipal Police Station, giila niini ang biktima nga si Carlos “Toto” Cerilo, 68-anyos, minyo ug nagpuyo sa Davao Occidental.
Saysay ni Agustin nga nagdrive og motor ang biktima sa dihang kalit na lamang kining gipusil sa wala mailhing suspek nga daling miikyas diin naigo sa nawong, ulo ug liog nga bahin ang biktima nga miresulta sa iyang hinanaling kamatayon.
Nasayran nga daghang gipangkasohan si Cerilo nga mga opisyales sa gobyerno ngadto sa Ombudsman o DILG ug adunay usay ginatabangan niini nga mga kaso sa yuta sa lugar.
Gawas nga nahimong ilado si Cerilo isip transport leader, misulay usab kini og sulod sa pulitika apan wala kini gipalad.
RadyoMaN Kirby Manzon
