Nagapati ang Punong Barangay sang Brgy. Antipolo, Pontevedra nga personal ang motibo sa pagluthang-patay kay Kagawad Edward Dominic Algara sang Purok Santan, nagligad nga Marso 23, 2020.
Sa interview kay Punong Barangay Jonathan Bayona, ginpahayag sini nga posible kilala sang biktima ang suspetsado sa krimen. Nahibaluan nga antes ginluthang sang suspetsado ang kagawad sa iya baligyaan sang feeds nagligad nga Marso 23, may nagsulod man nga lalaki sa iya baligyaan sang Marso 20 kag gintayaan sang armas ang iya isa ka timbang nga si Joseph Ignalague. Suno pa kay Kapitan Bayona, matapos ang insedente sang Marso 20, nagpost pa sa iya social media account ang kagawad kag ginhangkat ang may kahimuan sang insidente.
Para kay Bayona, nagkumpyansa gid si Algara sa iya seguridad apisar sang natabo sa iya store sang Marso 20. Nagapati si Kapitan Bayona nga posible personal ang pagpatay kay Algara bangud kilala ini nga “straight forward” kun maghambal. Apang suno kay Bayona, naanad naman ang mga pumuluyo sa Antipolo sa panghambal sang kagawad.
Apang wala ginadula ni Punong Barangay Bayona ang posibilidad nga may yara sang pipila nga naakig kay Algara gani ini ang ginpatay. Sa karun, ginahulat ni Bayona ang matul-id nga imbestigasyon sang Pontevedra Municipal Police Station sa krimen.
