Bukidnon – Nagpahinumdom ang Provincial Disaster Risk Reduction ang Management Council kon PDRRMC Bukidnon sa mga local DRRMC kalabot sa ipahigayon nga earthquake drill karong adlawa, Miyerkules.
Sa interview sa RMN Malaybalay ngadto kang PDRRMC Bukidnon Head Israel Johan Damasco, gibutyag niini nga kini nga earthquake drill simultaneous nga ipahigayon sa tibook nasud nga himoon alas 2 sa hapon.
Regular na matud pa kining gimbuhaton sa DRRMC aron ma-andam ang publiko ilabina kung adunay mahitabong linog.
Gipasabot ni Damasco nga sa nakalabay nga semana unta kini nga ipahigayon apan tungod sa gideklara nga national day of protest gi-uswag kini karong adlawa.
Samtang mangandam kanunay ang panawagan sa Philippine Institute of Volcanology and Seismology (Phivolcs)-Region 10 sa katawhan sa rehiyon hilabina nga sunod-sunod ang nasinating linog ning panahona.
Sa interview sa RMN ngadto kang Phivolcs 10 Regional Director Marcial Labininay gibutyag niini nga dili matagna ang maong kalamidad hinungdan ang pagbantay ug pagpangandam lang gyod ang importante.
Dungan niini gi-aghat ni Labininay ang publiko nga muapil sa pagahimoon nga earthquake drill ug preparedness seminar aron makabaton sa kahibalo kung adunay muabot nga katalagman.
