Mapanghinauton ang Provincial Health Office (PHO)-Bukidnon nga makab-ot pa sa probinsya ang gitinguhang Herd Immunity sa dili pa matapos ang tuig 2021.
Kini ang gitinguha ni Jennifer Malazarte, ang Vaccination Coordinator sa PHO-Bukidnon atol sa interview sa RMN DXMB Malaybalay.
Sumala niya nga kutob kagahapon anaa na sa 29.28% ang kompletong nabakunahan sa probinsya gikan sa target nga populasyon.
Dugang niya nga mapasalamaton sila tungod kay positibo ang epekto sa pagpamakuna sa mga kabataan nga nag-edad 12 anyos hangtud 17 anyos nga nagsugod sa milabayng semana nga naghatag paglaom kanila sa gitinguhang herd immunity.
Dugang niya wala gayud sila naglisud sa pagpamakuna sa maong pundok tungod kay daghan man ang nadasig nga magpabakuna na.
Gisulti usab ni Malazarte nga Pfizer ug Moderna vaccines lang ang gitugutan alang sa maong grupo maong panghimangno niya sa mga ginikinan nga bantayan gayud ang mga bakuna kung haom ba sa gitugutan sa gobyerno.
Man gani, kapin 700 ka mga kabataan sa probinsya ang nabakunahan diha sa likod sa Centennial Stage sa Capitol Grounds, Malaybalay City sa duha adlaw nga pagpamakuna nga mulungtad hangtud ugmang adlawa.
Padayon gihapon ang pagpamakuna sa probinsya sa Bukidnon ilabi na sa mga nag-edad 12 anyos pataas aron nga makab-ot ang gitinguhang herd immunity sa dili pa matapos ang tuig 2021.
