BACOLOD CITY – Nasunog ang isa ka salakyan nga Frontier pasado las 4 sini nga kaagahon sa sulod sang isa ka shop sa Gonzaga St., Brgy. 26 diri sa ciudad sang Bacolod.
Ang amo nga salakyan ginapanag-iyahan ni Engr. Vicente Guerrero, residente sang amo nga lugar.
Suno sa caretaker sang compound nga naga serbe shop kag bodega kon diin nahamtang ang nasunog nga salakyan nga nakibot na lamang sa hinali na pagtuhaw sang kalayo sa garahe.
Nasunog ang nauna nga bahin sang salakyan kag ang iya mga royda.
Wala naglapta ang kalayo kag gilayon nga napalong bangud man sang madasig nga pagresponde sang mga katapo sang Bacolod Bureau of Fire Protection.
Wala pa natumod sang BFP kon bala ano ang ginhalinan sang pagkasunog sang amo nga salakyan./dyHB BACOLOD
