Gin-konpirmar ni Miagao Municipal Mayor Macario Napulan nga may mga area sa banwa ang apektado sang landslide ilabi na ang dalan sa Brgy. Sibucao sa diin naglab-ot sa pito ka tapak ang nagtiphag nga duta sa karsada rason nga indi ini ma-agyan sang mga salakyan.
May yara man sang landslide sa Cagbang- Tumagbok road, bahin sang dalan sa barangay Lacadon pakadtu sa kasunod nga barangay sang Igdulaca kag sa Brgy. Wayang.
Dugang pa sang alkalde nga may report man sila nga nabaton sa magagmay nga pagtiphag sang duta sa upland barangay sang Tigmalapad kag Ongyod kaina sang aga.
Sang nagligad nga adlaw, personal nga gin-assess sang Mines and Geosciences Bureau (MGB) Regional Office 6 ang mga landslide prone barangay ilabi na ang Brgy. Igcatambor sa diin naglab-ot sa masobra 2 ka hektarya ang naglitik kag natiphag nga duta.
Maluwas sa mga barangay nga nauna ginpahayag, nalakip man sa gin-assess ang Barangay Buenavista Sur, kag Igdalaquit.
Kasunod sini ginmandu sang MGB 6 sa mga residenti ang pre emptive evacuation sa nahinambitan nga kabarangayan.
