Davao City – Nag-una ang Pilipinas sa Southeast Asia sa pinakadaghan og na-test sa COVID-19 nga anaa na sa dul-an duha ka milyon.
Matud ni Department of Health (DOH) Undersecretary Leopoldo Vega, subay sa report, ang Pilipinas nagpabilin sa top spot sa Southeast Asia sa pinakadaghang kaso o anaa sa 169, 213 cases (cumulative) ug ikaduha ang Indonesia nga adunay 143, 043 ka kaso as of August 18, 2020.
Gipasabot ni Vega nga tungod sa paspas nga testing, taas usab ang mga makuhang nagpositibo sa COVID-19.
“Kita puy number 1 sa testing. Mas paspas na ta we’re already 2% of the population, that’s about close to 2 million ang atoang na-test nationwide. The more ang imong ma-test, the more ang imohang makuha nga positive. Maayo na kay atleast ma-identify nato kung kinsa na sila,” sumala ni Vega.
Dugang sa Undersecretary, anaa sa 28, 000 ngadto 30, 000 kada adlaw ang ma-test sa 109 ka licensed COVID-19 testing laboratories sa Pilipinas.
Samtang kontrolado matud pa ang mga kaso sa Visayas ug Mindanao kung itandi sa Metro Manila ug CALABARZON nga densely populated (daghan) ug ubay-ubay usab ang informal settlers ug kabahin usab niini ang behavior (batasan) sa tawo hinungdan nga paspas ang pagkaylap sa COVID-19.
RadyoMaN Aimee Guinita
