El Coast Guard Zamboanga Commander Noriel Ramos ya habla possible maga “backdoor” Pilipino el maga victima del tragedian a mar ya sosede na border del Malaysia y Pilipinas del Julio 30.
Si Ramos ya habla base na report del Philippine Coast Guard ta aparese el M/L Temper, pumpboat con un operator ta carga 15 maga pasajero desde Sapa-Sapa, Tawi-Tawi donde ta composite de edad y maga bata ya navega del Julio 30 para na Malaysia.
Pero del mismo dia cuando ya llega sila na mar del Malaysia, ya dale canila encuentro maga grande-grande marijada por el mal tiempo.
Resulta, ya man balisacat el pumpboat y ya lleva canila na corentaso del maga marijada na diferentes direccion.
Na 16 maga victima inlujido el operator, unu lang conquien ya puede man rescue el maga pescador na Talapan Reef.
Con el survivor ya conose como si Ibrahim Hassan Mandul, Banaran, Lookan, Sapa-Sapa, Tawi-Tawi.
Asegun con Ramos alamañana ya, ya puede man rescue con Mandul donde dayun conele ya entrega con maga Coast Guard.
Si Mandul amo el quien ya cunta istorya con el maga otoridad cosa ya pasa canila.
Agusto 4 ya cuando unu-por-unu ya puede encontra con el ciete maga cadaver na diferentes lugar n area del Philippine Sea particular serca na Tawi-Tawi.
Comporme esta, hocho maga cuerpo el ta hace embuscada el maga Coast Guard y otro agencia de govierno.
Asegun con Ramos, el mencionao pumpboat gendeh registrao na concierne agencia y recio asegun este ta usa para transporta maga Pilipino quien ta entra pormedio de “backdoor” na Malaysia.
