Natala sa siyudad sa Valencia ang pinaka-unang local transmission sa COVID-19.
Matud sa Valencia City Inter-Agency Task Force on COVID-19 nga gi-anunsiyo kagahapon sa Department of Health ang 3 ka bag-ong kaso sa virus sa Valencia kung asa, usa niini local transmission.
Ang tulo ka bag-ong kaso mao ang ika-16, 17 ug 18 na kaso sa virus sa mao nga siyudad.
Ang case no. 16, usa ka usa ka 13 anyos nga batang babaye, manghod ni patient no. 13 nga taga Barangay Bagontaas. Gikonsidera kini nga local transmission.
Nasuta ug na-isolate na usab ang tanang tawo nga naka-contact niini.
Napailawom na usab sa RT-PCR test kung asa nag-negatibo ang resulta.
Samtang ang case no. 17 usa ka lalaki nga gikan sa Makati City nga nagpuyo sa Purok 2, Lumbo, Valencia City ug ang ika-case number 18 usa ka lalaki nga 19 anyos nga taga Purok 2, Lumbo.
Tungod sa mao nga bag-ong duha ka kaso sa Brgy. Lumbo, nag-isyu si Valencia City Mayor Azucena Huervas ug Executive Order 49 s. 2020 nga nag-deklara sa Iglesia sa Dios Espiritu Santo Compound sa Purok 2, Lumbo, Valencia City, Bukidnon isip Critical Zone (CrZ) ug pagpailawom niini sa Enhanced Community Quarantine (ECQ).
Gisuta niini nga mamahimong adunay mga nagpuyo sa mao nga compound nga na-expose sa duha ka mga pasyente hinungdan aron ipailawom sa hugot nga pagmonitor ang mao nga partikular nga dapit.
