Gibuksan na kaganihang buntag ang pinaka-unang tissue culture Laboratory sa Misamis Oriental nga nahimutang sa Purok 6, Barangay Poblacion lungsod sa Sugbongcogon.
Kini ang collaborative project sa Provincial Government, Department of Science and Technology o DOST, Philippine Fiber Industry Development Authority-10, Department of Agriculture-10 ug Department of Agrarian Reform-10.
Sulod sa maong laboratoryo ginahimo ang proseso sa pagpadaghan sa similya sa nagkadaiyang tanum sama sa saging ug abaca.
Matud ni Maam Lothah Grace Talo, ang Technician sa Tissue Culture Laboratory nga mokabat sa 8 ngadto sa 10 ka bulan ang gidugayon sa proseso una kini mamahimong itanom.
Sa iyang bahin, gibutyag ni Gobernador Yevgeny Emano nga pinaagi sa tissue culture laboratory, makasiguro ang mga mag-uuma nga nindot ang kalidad sa ilang abot.
Mas dool usab ang paghatud sa saging ngadto sa kasikbit nga mga siyudad ug probinsya tungod kay dool lang sa Tagoloan port ang maong laboratoryo.
Pinaagi niini, layo sa mga sakit ang mga tanum ug pareho ang tubo sa gi-culture nga similya.
Una nang gibutyag ni Gov. Emano nga gusto niining mahimong orchid capital of the Philippines ang Misamis Oriental ug posible matud pa kini pinaagi sa tissue culture laboratory.
Gikalipay usab ni Sugbongcogon Mayor Mildred Lagbas Mondigo nga gipili ang ilang lungsod nga butangan sa tissue culture laboratory.
