NEGROS OCCIDENTAL – Hugot nga ginakondenar sang Leonardo Panaligan Command sang New People’s Army Central Negros Guerilla Front ang natabo nga pagtiro kag pagpatay kay Jerry Torga subong man pagkasamad sa isa ka sibilyan sadtong Abril 28, 2018 sa Brgy. Guinpana-an, Moises Padilla, las 4 sang hapon.
Sa ginpagwa nga Press Release sang NPA-LPC, ginpahayag sang spokesperson sini nga si Ka JB Regalado nga si Jerry Torga kag ang isa pa sibilyan ang biktima sang riding in tandem kag Extra Judicial Killings ukon EJK.
Suno kay Ka JB nga ini sa pihak sang ginatikal ni Mayor Magsie Peña nga estrikto nga ginapatuman ang iya Executive Order No. 17 sa Magallon kon diin aktibo nga nagapatigayon sang checkpoints sa mga dalanon sa bug-os nga bahin sang Moises Padilla.
Dugang pa sang rebeldeng hubon nga damlag pa, ginpalapta sang AFP upod kay Peña ang mga litrato sang mga lideres kag representante sang progresibo kag demokratiko nga mga organisasyon sa mga public places sang Magallon.
Ini nga butang ang ginakabig sang NPA nga isa ka malisyoso kag desperado nga tikang sang Armed Forces of the Philippines kag ni Peña nga ginlakip ini sa lista sang ginaalegar nga mga terorista sang US-Deterte nga rehimen.
Ang kaangtanan ni Torga sa pila ka mga progresibong grupo amu ang ginalantaw sini nga rasun kon ngaa nga gintiro sang ila ginasiling, mga tawo man ni Peña. /dyHB BACOLOD
