Report ni: Jennifer Palomo Debaja
Nagviral sang damlag lang ang litrato sang isa ka OFW sa Riyadh, Saudi Arabia matapos ginpa gaid sa kahoy sang amo sini.
Ginkilala ang Pinay kay Lovely Acosta Baruelo sang Bauang, La Union.
Nahibaluan nga antis pa man nabalhag ang litrato, nakabaton na sang tawag ang OWWA RWOI halin sa Local Government Unit sang Bauang, La Union nahanungod sa pagpang maltrato sang employer kay Baruelo sa Saudi.
Sa koordinasyon sang OWWA RWOI sa iban pa nga ahensiya sang gobyerno natrace up ang nahamtangan sang pinay.
Sang Mayo 14, 2019 personal nga nagbisita ang OWWA RWOI staff sa poluy-an ni Baruelo sa pagpanguna ni Welfare Assistance Unit Head Ms. Loreta B. Vergara kag nainterbyu ang iloy sini.
Bangud sa dinangatan sang Pinay, naghatag ang OWWA RWOI sang livelihood assistance paagi kay OIC Gerardo C. Rimorin. Gin award ang Balik Pinas, Balik Hanapbuhay (BPBH) livelihood assistance Kay Lovely Baruelo.
Sa interbyu sang OWWA kay Baruelo via video call, ginsaysay sini nga may nagluntad nga indi pag intindihanay sa iya kag sa mas nauna sa iya nga timbang parti sa sala set nga ibulad kontani sa initan sang sila nag patigayon sang general cleaning.
Suno Kay Baruelo nanugid ang upod sini sa ila Prinsesa nga employer rason nga ginmando ang paggaid sa iya sa kahoy halin alas 2:00 sa hapon tubtob alas 9:00 sa gab-i. Ginkuha lang ang gaid sini matapos may nag suggest sa pamilya sang employer nga edeport nalang insigida ang Pinay.
Magluwas sa Php 20,000 nga livelihood assistance nga gin award kay Baruelo sang Mayo 17, 2019, gin tanyagan man ini sang iban pa nga programa sang OWWA pareho sang Skills for Employment Scholarship Program (SESP) kag IT Training tungod active pa ang OWWA membership sini.
Dugang pa sa mga programa sang OWWA, buligan man si Baruelo sang iya financial claims batuk sa iya local recruitment agency paagi sa Single Entry Approach (SENA).
