Roxas City, Capiz- Isa ka Pinay nurse ang nagpanubli sang $60 million dollars nga balor sang manggad kag propidad sang nangin amo sini sa Amerika.
Ini ang katumbas sang duha ka bilyon ka pesos nga balor sang kwarta sa Pilipinas.
Tuig 2011 sang bawian sang kabuhi ang Amerikana nga si Huguette Clark nga isa ka anak sang senador kag tag-iya sang isa ka minahan.
Bangud nga wala sang anak si Clark, nadesisyunan sini nga partehon ang iya kwarta kag propidad sa iya mga nurse kag aid.
Isa sa mga ginsuwerte ang Pinay nurse nga si Gicela Oloroso nga taga Sapian, Capiz.
Nahibaluan nga antes pa mangin nurse si Oloroso, may kaya na ang ila nga pamilya gani makabig ini nga dugang nga blessings ang ginpabubli sa iya sang amo sini.
Nalakip naman si Oloroso sa gin-release nga libro angut sa kabuhi Clark nga gintig-ulohan “Empty Mansion” nga ginsulat ni Bill Dedman kag Paul Newell, Jr.
Tuig 1972 sang nagsulod ang sadto 22-anyos pa gid lamang nga si Oloroso bilang nurse sa Amerika kag wala sang ideya sa mangin kapalaran sini halin sa iya mangin amo.
Suno sa balita, nakapangasawa si Oloroso sa New York sang isa ka Israeli nga ang relihiyon ang Orthodox Judaism kabangdanan nag-ilis si Oloroso sang pangalan bilang Hadassah Peri.
Matapos siya nga ginkasal sa Israeli, na-assign si Oloroso bilang isa ka private nurse ni Clark, isa ka 82 year old nga Amerikana nga naka-undergo para sa operasyon sa balatian.
Nangin madinalag-on ang operasyon para kay Clark kag nabuhi ini snag tubtob 104-anyos.
Si Oloroso ang ginakabig na nga pamilya ni Clark kag mangin ang day off sini ang ginahatag niya agud lamang alagaan ang iya amo.
Bangud sa ginpakita nga pagkatampad ni Oloroso, ginhatagan ini sang iya amo sang pito ka balay sa diin ang duha diri ang may yara sang magarbo nga apartment. Ginpa-eskwela man ni Clark sa pribado nga boluthoan ang tatlo ka mga kabataan ni Oloroso.
“She paid for twenty years of schooling for the three Peri children.. for their medical bills, piano lessons, violin lessons, and Hebrew lessons, their basketball and summer camps in upstate New York. When Peris had some trouble with back taxes, she paid for the as well,”
