Wala pa nakapahimulos ang pipila ka mga drivers ug operators sa Public Utility Jeepney kon PUJ sa ilang fuel subsidy nga programa sa gobyerno.
Kini ang gibutyag ni Aminoden Guro, ang Regional Director sa Land Transportation Franchising and Regulatory Board kon LTFRB region 10.
Matud ni Guro, kini tungod kay kasagaran sa mga sakyanan o PUJ napalit na sa laing operator, ug ang ilang na approve nga card nakapangalan pa sa daan nga tag-iya.
Buot ipasabot, dili madawat sa bag-ong operator ang subsidiya, kung wala ma-transfer sa iyang pangalan ang prangkisa sa sakyanan.
Giklaro usab ni Guro, nga dili na usab mabalhin pa sa bag-ong tag-iya ang prangkisa, tungod kay dili na kini pwede nga i-transfer sugod niadtong tuig 2016.
Tungod sa isyu nga pagbaligya sa prangkisa, wala na tuguti sa gobyerno nga ibalhin sa bag-ong tag-iya sa usa ka PUJ ang prangkisa sa sakyanan.
Matud ni Guro nga dunay gihimo karon ang ilang opisina nga tugutan na ang mga bag-ong tag-iya o bag-ong nakapalit sa sakyanan nga makakuha sa ilang fuel subsidy bisan pa og wala na transfer sa ilang pangalan.
Dugang pa ni Guro nga kini ang ilang gitrabaho karon, pinaagi sa pagpangita sa Deed of sale, litrato sa daan ug bag-ong tag-iya sa sakyanan, ID, Special Power of Attorney kon SPA ug uban pa.
Nasayran nga kini nga subsidiya alang kini sa mga drayber, apan gihatag sa gobyerno ngadto sa mga operator kay sila ang dunay prangkisa.
