General Santos City—Nagsugod na sa pagdagsa ang katawhan sa mga sam-ang sa dakbayan sa GEnsan bisan nga sa petsa 1 pa ang kalag-kalag.
Sumala ni Manny Capistrano, CSU nga nakabase sa Antonio C. Acharon Memorial Park nga niadtong Domingo duna nay mga nahidangat sa ACAMP aron sa pagbisita sa ilang minahal sa kinabuhi nga nalubong sa maong sementeryo.
Sagad sa mga nahisgutan gikan pa sa mga lagyong lugar sama nalang sa South Cotabato, Davao ug Sarangani Province. Usa sa mga rason sa sayong pagbisita sa mga nahisgutan sa ACAMP aron nga dili na nila masinatian ang kaguot sa lugar atol sa pagdagsa sa mga tawo nga mubisita usab sa ilang minatay.
Gikumperma usab ni Capistrano nga han-ay na ang tanan sa Antonio Acharon Memorial Park. Gikan sa paghan-ay sa tanang musulod sa sementeryo apil na ang mga tent nga ibutang sa sulod niini.
Kagahapong adlawa, gisugdan na nila ug butang ang mga tent ingon man mga railings gikan sa GSO kansa ilang ibutang sa entrada nga bahin aron makontrola ang mga musulod sa lugar.
Usa sa mga problema sa ACAMP ang pipila ka pasaway nga gadala ug sakyanan tungod adunay uban nga dili iparking ug sakto ang ilang mga sakyanan ngadto sa gitaganang parking area.
