Dipolog City – Gumikan sa nasinating pagbundak sa ulan sugod pa kagahapon hangtud na kaganihang kaadlawon, dinala sa Low Presure Area (LPA) dunay pito ka Barangay sa dakbayan sa Dipolog ang naapektohan sa tubig baha.
Si Mr. Felipe Mangila Jr. sa City Disaster Risk Reduction Management Office (CDRRMO) nibutyag sa interview sa rmn dxdr nga adunay pito ka barangay ang nareport sa ilang buhatan nga apektado sa tubig baha mao ang Barangay Dicayas, Barangay Punta, Barangay Gulayon ug portion sa Barangay, Turno, Barangay Sangkol ug Barangay Lugdungan ingon man Barangay Sta. Isabel.
Sa ilang gihimong pagmonitor sa Dipolog river pasado alas 10:00 sa gabii, nisugod pagtaas ang tubig baha ug nianang alas 3:00 sa kaadlawon nilapas sa alert level ang tubig hinongdan ila gilayong gipahimangnoan ang mulupyo daplin sa suba uban ang mga Barangay opisyal sa maong mga barangay nga paandamon sa pagbakwit.
Sa interview sa rmn dxdr kang kapitan Tito Maligro sa barangay Dicayas tulo ka Purok ang apektado sa iyang Barangay mao ang Purok Bayugo, Purok Violeta ug Purok Daan Lawas.
Taga hawak ang tubig baha sa may Prk. Bayugo lapas tawo sab ang Prk. Daan Lawas diin sa Kinatibok-an matud pa ni Kapitan nga dunay 80 ka household ang apektado sa iyang Barangay.
Samtang si Barangay Chairman Armando S. Drilon nahinabi sa rmn dxdr niingon nga kalit kaayo ang pagtaas sa tubig baha agig pag-awas sa Punta River sa may Tamilokan Bridge.
Pasado alas 9:00 sa gabii nagsugod ang pagtaas sa tubig baha nga sumala pa dunay lima ka Purok ang apektado mao ang La Solidaridad, Makugihon, Balintawak, El fili ug Bogainvilla.
Gidungan pa ni Kapitan nga ang Purok La Solidaridad ug Makugihon maoy nagrabihan nga taga dughan ug dunay lapas tawo ang gilawmon sa tubig nga gihulaway dunay 76 ka household apektado na giabot sa tubig baha ang panimalay ug 12 ka pamilya ang nibakwit sa barangay hall apan nianang pakabuntag niuli ra sab kini sa ilang panimalay dihang ni kibra na ang tubig baha.
Si Barangay Kagawad Rodrigo Bolando namahayag nga apektado ang sitio Balabag sa Barangay Gulayon diin dunay lima ka mga balay ang nalubog sa tubig baha ug dunay usa ka baka ang gianod.
Ang uban gibahaan barangay ginagmay lang nga nasinati mao lang pagtaas sa tubig baha kon diin diha lang sila sa ilang mga silingan nihiklin.
Sa kasamtangan padayon pa ang assessment sa buhatan sa CDRRMO sa naapektohan mga Barangay. (r.m)
