Maguindanao Province—Sikop ang mokabat sa pito ka mga myembro sa Bangsamoro Islamic Freedom Fighters kon BIFF sa Sitio Barugot, Barangay Mother Tuayan, Datu Hoffer, Maguindanao niadtong nakalabayng adlaw atol sa gipahigayong operasyon sa militar.
Sumala kang Lt. Gen. Corleto Vinluan, Jr., Commander sa Western Mindanao Command nga samtang nagpahigayon ug combat clearing operation ang tropa sa 40th Infantry Battalion sa maong lugar nadakpan ang pito ka mga armed personalities nga nagpaila matud pang miyembro sa 105th Base Command sa Bangsamoro Islamic Armed Forces. Apan sa dihang gipangayuan ang mga nasangpit ug mga pamatuod nga sila lehitimo nga miyembro sa maong grupo, wala gipakita ang mga nasangpit hinungdan nga sila gipangdakop ug gipang dis-armahan ug gidala sa Maguindanao PNP.
Matud kang 40th IB Commanding Officer Lt. Col. Rogelio Gabi nakumpiska sa tropa ang duha ka M1 Garand rifles, 1 ka M14 rifle, 1 ka M4, ug uban pa nga mga himan pang-gyera. Kalabutan niini, gibutyag ni 1st Mechanized Infantry Brigade Officer-in-Charge Col. Ferdinand Lacadin, gimanduan na niya ang 40th IB ug 1st Mechanized Battalion nga ipadayon ang pagpahigayon ug combat clearing operations sa maong lugar sa posibleng pagneutralize sa daghang miyembro sa BIFF militants. Gihatagan usab ug komendasyon ni Joint Task Force Central Commander Maj. Gen. Juvymax Uy ang operating troops sa determinasyon nga mapabilin ang kahapsay ug kalinaw sa central Mindanao. -credit to Westmincom
