EB MAGALONA, NEGROS OCCIDENTAL – Kapin pito ka puno sang tanum nga marijuana ang natigayon nga ma recover sang utoridad sa puluy-an sang suspek matapos ginpatigayon ang isa ka buybust operation gid lamang nga hapon sa Brgy. Alicante, banwa sang EB Magalona.
Nakilala ang suspek nga si John Allen Lamayo, 25 anyos, single kag pumuluyo sang Purok Lanog-lanog, Had. Teresa, Brgy. Alicante, EB Magalona.
Suno sa hepe sang EB Magalona Municipal Police Station, Police S/Insp. Jaynick Bermudez nagpatigayon sila sang buybust sa puluy-an sang suspek may mga las 12:50 sini gid lamang nga udto.
Ini matapos nga naka baton sila sang impormasyon nga may yara sang gina-cultivate nga tanum sang marijuana ang suspek sa likod sang iya balay.
Sa amo nga buybust, wala labot sang pito ka stick sang gin-likit nga marijuana subong man tooter, na-recover pa gid sang utoridad ang pito ka puno sang matag-as na nga tanum sang marijuana.
Sa karon detained na sa custodial facility sang EB Magalona Municipal Police Station ang suspek kag natalana nga pasakaan sang kaso./Melandro Benetua photo/DYHB
