Pagapatungan man sang excise tax ang mga plastic bags nga ginagamit sa mga supermarkets, malls, shops, sales outlets kag iban pa nga kaangay nga establisyimento.
Sa House Bill 8523 ukon Plastic Bag Tax Act nga ginfile ni Sultan Kudarat Rep. Horacio Suansing, pagapatungan sang P10 excise tax ang kada plastic bag nga gamiton ukon butangan sang mga ginpamakal nga produkto halin sa mga nasambit nga establisyimento kag balaklan.
Igapatong ang nasambit nga excise tax sa plastic bags sa mga establisyimento nga may gross receipts nga lampas sa P100,000 ukon mga bag-o gintukod nga negosyo nga may capital nga indi magnubo sa P100,000.
Exempted naman sa P10 nga dugang nga excise tax ang pila ka produkto ukon pagkaon nga plastic ang ‘original packaging’ kaangay sang isda, karne, poultry products, otan, prutas, confectionery, dairy products, ice kag mga ginluto nga pagkaon.
Paathag ni Suansing, makabulig ang dugang nga excise tax sa mga plastic bags agud malikawan ang paggamit sini nga makaguba naman sa palibot kag may malain nga epekto sa ikaayong lawas.
Ang makolekta nga buhis halin diri ang pagagamiton agud pundohan ang mga programa kag proyekto sang gobyerno ilabi na sa mga programa sa pag-away sa epekto sang paggamit sang plastic.
(photo from web)
