Gitugutan na nga matanggal sa mga pampasaherong sakyanan ang gitaod nga mga Plastic Barriers aron nga mahilikay sa sakit nga Covid-19 ang katawhan alayon sa pagpailawom sa rehiyon-X sa Alert Level 2 status.
Kini ang gibutyag ni Aminodin Guro, Regional Director sa Land Transportation Franchising and Regulatory Board (LTFRB)-10 atol sa interview sa RMN DXMB Malaybalay.
Sumala ni Guro nga kini alayon sa pagpagawas sa LTFRB sa Memorandum Circular 2021-064 nga gi-issue atong Nobyembre 2, 2021 mahitungod sa pagpatangtang sa mga plastic barriers sa mga pampasaherong sakyanan sa tibook nasud.
Dugang ni Guro nga gipasakaan na usab sa 70% ang kapasidad sa mga pampasaherong sakyanan apan magpabilin lang gihapon sa pagsunod sa mga minimum public health standards aron nga mahilikay sa sakit nga Covid-19.
Giklaro usab ni Guro ang mga reklamo kabahin sa pletehan nga kinahanglan adunay taripa ang mga dipaseruan nga sakyanan sa pagsukot og taas nga plete apan kung wala mamahimo nga mupadangat og reklamo ang mga pasahero aron nga matagaan og aksyon sa buhatan.
Dugang niya nga pwede mupadangat og mensahe sa social media sa LTFRB o di ba kaha nga mutext o tawag sa LTFRB Hotline nga nakapaskil sa mga pampasaherong sakyanan.
