Suportado sa kadagkoan sa Police Regional Office 10 nga no take policy ni PNP Chief Police General Archie Gamboa.
Una niini, gimando ni Chief Gamboa ang “no take policy” diin gihingusgan ang baruganan sa kapulisan nga dili molambigit sa ilegal nga mga kalihokan labi na sa mga pagdawat og mga kwarta o suhol gikan sa ilegal nga kalihokan.
Sa interview sa RMN Malaybalay ngadto kang PNP 10 Regional Spokesperson Police Lt. Col. Mardy Hortillosa, gibutyag niini nga nag-atubang ang PNP sa isyu nga adunay pipila nga nagdawatan ug suhol gikan sa illegal nga kalihukan.
Matud niya nga epekto niini mao nga mawad-an ug pagsalig ang publiko sa kapulisan.
Kini ang hinungdan nga ilang gipadayag ang ilang tibuok ug hugot nga suporta sa kamandoan sa ilang labaw.
Gipasabot pa ni Col. Hortillosa nga adunay mga utukan nga mga tawo nga mabugo na kung masilaw sa salapi.
Posibleng mag-atubang og kasong administratibo ug kriminal ang personahe sa kapulisan nga mapamatud-an nga sad-an.
