MOISES PADILLA, NEGROS OCCIDENTAL – Posible mga katapo sang Special Partisan Unit ukon SPARU sang New People’s Army, NPA ang responsible sa natabo nga pagtiro kag pagpatay sa isa ka miemro sang Barangay Peacekeeping Action Team ukon BPAT kahapon sang aga sa Brgy. Guinpanaan banwa sang Moises Padilla.
Ang biktima nga si Michael John Ruales, 32 anyos ang edad, pumuluyo sang Baryo Daan sang amu nga barangay, gintiro sang riding in tandem pasado las 10 kahapon sang aga sa Purok 2, Brgy. Guinpanaan.
Suno kay Moises Padilla Police Station chief, Police C/Insp. Edfel Balibadlan nga may mga impormasyon sila nga nabaton nga ang mga suspek ang ginaalegar mga miembro sang SPARU.
Ini bangud nga sang natabo ang insidente, isa sa suspek ang naghambal nga “ indi kamo mag-intra kay NPA ini.”
Ang biktima nag-angkon sang duha ka igo sang luthang sa iya dughan kag ulo kag gindala pa sa Corazon Locsin Montelibano Memorial Regional Hospital las 12 pasado sang udto apang gin-declare nga dead on arrival./dyHB
