Hugot nga gisunod sa Philippine National Police o PNP ang protocol sa pagpagawas sa impormasyon kalabot sa National Security.
Kini ang tubag ni PNP Spokesman Police Chief Supt. John Bulalacao tungod sa mga report nga matud pa dunay mando si Presidente Rodrigo Duterte sa hanay sa PNP nga dili bali-balihon ang UN rapporteurs nga mag-imbestiga sa matud pa human rights abuse sa Pilipinas.
Gibutyag ni Bulalacao, ang bisan unsang impormasyon nga pangayoon sa mga international bodies gikinahanglang moagi sa proper channels.
Gipasabot ni Bulalacao, ang PNP anaa ubos sa executive branch sa gobyerno busa ang mga mas naa sa taas ang makadesisyon kalabot sa maong hisgutanan.
Mahinumdumang una nang gisupak ni PNP Chief Police Director General Ronald Bato Dela Rosa ang pagpagawas sa mga sensitibong case files sa CHR kabahin sa pagkamatay sa mga drug personalities sa kampanya kontra droga.
Girason kaniadto ni Dela Rosa ang “National Security” ug gibutyag nga mabutang sa peligro ang mga pulis nga nalambigit bisan ang ilang pamilya nga pwedeng target sa mga sindikato sa droga isip pagpanimalos.
-o0o-
