Davao City – Gitina-aw sa Tagum City Police Office nga walay kamatuoran ang nikatag nga impormasyon nga gipusil sa maselan nga parte sa lawas ang NPA leader kinsa nisukol-patay sa operasyon sa mga awtoridad sa may P-3, Brgy Canocotan,Tagum City, Davao del Norte.
Sa interbyu sa RMN Davao kang Tagum PNP spokesperson Police Captain Anjanette Tirador nga base sa resulta sa Medico Legal sa patayng lawas ni Cindy Terado “KA Jill”, Secretary, Guerilla Front-2, nga gikan sa Tagum City Health Office nga nakahiagom og mga gunshot wounds ang biktima ubos sa pusod ug sa upper chest niini ug dili sa kinatawo niini.
Nakigbinarilay matud pa ang maong babaeng suspek atol sa pagsilbi sa warrant of arrest sa nagkalain-laing kaso batok sa niikyas nga kapuyo niini nga si Jay Mendoza o alyas Bogs, Deputy Secretary sa Guerilla Front 2 ug Executive Committee sa Sub Regional Committee 2 under Southern Mindanao Regional Committee.
Narekober sa crime scene ang M16 nga gigamit ni Terado.
Samtang, gibatbat ni 1001st Brigade Commander BGen Gilbert Saret nga abli usab ang kasundulahan kung aduna may ikasang imbestigasyon ang Commission on Human Rights aron masuta ang kamatuoran sukwahi sa gipagulang pamahayag sa Gabriela Partylist sa social Media.
Matud ni Saret kung diskumpyado usab ang mga kabanay angay nga ipailawom nila kini og awtopsiya.
RadyoMaN Aimee Guinita
