PNP Traffic Investigator tagtionan nan armas sa misis nan isa ka Retired Police Colonel sa Surigao City. Sa sumbong ni P02 Richie Manongas alas 7:30 sa buntag kahapon sa dihang noresponde sija sa isa ka aksidente sa trapiko sa Rizal-Gimena St., Brgy.?Washington, Surigao City. An mga naglangkob sa disgrasya an isa ka truck ug kotse na tagpanag-ija ni Ret. Col. Alejandro Recimo. Matud pa, morag daan nasuko si Recimo sa pag-abot pa daan nija labi na sa pagpahigayon sa imbestigasyon sa panghitabong disgrasya. Nagka-initay pa an duha ka habig sa pulong na “Buang” gumikan sa pagsabot sa magtiayong Recimo na tagtawag nija na “Buang” an retiradong pulis. Pagpaklaro pa ni P02 Manongas, waya nija tagsulti an amo na pulong, kundili an pamahayag na “Nabuang na, uman ako naman hinoon an tagkontra na noresponde raman ko sa aksidente”. Sa amo na panghitabo, noapil na an asawa na si Juliet Recimo ug nokadto ini sa atubangan na inkuranan sa sakyanan, tagkuha an sling bag ug tagbunot, diretso tagtion an .45 kalibre sa armas. Tagtudlo ni P02 Manongas na tagsagi nija an armas ug tagsagda isab sa nakasaksi na Traffic Enforcer Portuguese si Mrs. Juliet Recimo. Dugang pa, sa pagkakita ni Ret. Col Recimo sa taghimo na pagtion sa asawa, ini tagbira sakay sa ila sakyanan ug midiretso sa City PNP para sa pagpatala sa panghitabo. Sa habig nan mga Recimo tagpanhimakak an alegasyon ug tagtindugan na waya tioni nan armas si P02 Manongas. Kahapon pormal na misang-at nan kasong Direct Assault an Traffic Investigator batok sa magtiayong Recimo.
