Luwas na ang kahimtang sa duha ka mga biktima sa pagpamusil nga nahitabo sa South Poblacion, Maramag, Bukidnon kagahapon sa kadlawon.
Nasayran nga naila ang mga biktima nga sila si Rodrigo Neri, 33 anyos, Municipal Councilor sa lungsod sa Quezon ug usa ka Ben Edulano, 54 anyos nga taga Sinuda, Kitaotao, Bukidnon.
Sa imbestigayon sa PNP nga samtang sakay ang duha, kauban ang laing upat ka mga kaubanan niini sa usa ka Nissan Navarra gikan sa usa ka derby sa Maramag Cockpit Arena ug pauli na unta kini sa lungsod sa Quezon, nihunong kini sa Sayre Highway, P-3,South Poblacion, Maramag aron mangape apan gipusil sa wala mailang suspek gamit ang mubo nga klase sa armas.
Daling gidala sa balay tambalan ang mao nga Konsehal sa lungsod ug kauban niini human nga naka-angkon ug mga samad pinusilan.
Sa interview sa RMN DXMB Malaybalay ngadto kang Police Lt. Col. Silvestre Asiong Jr, ang hepe sa Provincial Investigation and Management Division gibutyag niini nga nakuha na nila ang usa sa mga person of interest sa mao nga pagmapusil.
Matud niya nga dili una nila hinganlan ang suspek tungod kay gi-andam pa ang kaso nga ilang ipasaka batok niini.
Positibo matud pa kining gitudlo sa biktima ang mao nga suspek nga taga lungsod sa Quezon.
Sigun ni Asiong nga ang mao nga POI nagsilbing driver sa motor. Sa karon gipakisayran pa ang gunman sa mao nga krimen.
Gidugang ni Asiong nga bangi sa pamilya ang usa sa motibo ug anggulo nga ilang gitan-aw sa mao nga pagpamusil.
Samtang gikasubo sa lokal nga gobyerno sa Quezon, Bukidnon ang maong panghitabo sa usa ka konsehal sa lungsod.
