General Santos City–Padayon ang ginahimong ibistigasyon sa Police Station 1 kabahin na sa nahitabong abduction ilawom sa ilang area of responsibility kung asa biktima niini ang usa ka Romel Evangelista, 31 anyos nga taga Silway, Barangay Dadiangas, West nings syudad.
Sumala ni Police Captain Abdulsalam Mamalinta ang hepe sa Police Station 1 nga sa karon blangko pa sila sa mga posibleng suspect sa maong krimen mao nga mas gipalawman pa nila karon ang ilang gihimong imbistigasyon.
Nasayran nga pauli na unta sa ilahang panimalay ang biktima kauban ang iyahang asawa nga si Gizel Evangelista gikan sa Police Station 6 human nga nakagawas sa prisohan, gi-atangan kini ug puting van sa Niyog Street, Barangay Dadiangas South ug pugsanong gidagit.
Pagka-ugma, nakit-an nalang ang biktima nga patay na sa may Barangay Kablon, Tupi, South Cotabato kung asa naputos ug samad dinunggaban ang lawas, nakagapos ang duha ka kamot, may agig tinuokan ug nakaputos pa ug tape ang nawong niini.
Samtang angulong may kalabutan sa binuhatan nga pagpangawat sa nasangpit nga biktima ang ilahang ginasundan karon nga motibo kabahin na sa pagdagit ug pag patay sa nasangpit.(Dave Silagan)
