General santos City—Blangko pa ang Police Station 2 kalabutan na sa pagpamusil sa Elf Driver nga si Nestor Apostol, 47 anyos, residente sa Purok 10, Katangawan, Gensan kansa gipusil sa wala pa mailhing suspek alas 7:50 ang takna sa gabie sa may Barangay Sinawal, Gensan.
Sumala ni Police Major Ananiaz Vasquez, Hepe sa Police Station 2 base sa ilang pakighinabi sa pamilya sa biktima, wala silay nasayran nga adunay nakalaban ang biktima ayha ang krimen.
Bisan na ang mga kaubanan niini sa trabaho walay kasayuran kung may atraso ang nasampit nga biktima gumikan bag-uhay lang kining misulod isip driver sa usa ka dressing plant sa Barangay Sinawal.
Dugang pagbutyag ni Police Major Vasquez nga sa karon ila nalang palawman ang ilang imbistigasyon aron nga matumbok ang motibo sa krimen.
Samtang ila usab nga huwaton nga makarekober ang biktima nga kasamtangan nagpaalim sa iyang samad nga naangkon sa ospital aron nga sayron ang mga posibleng motibo ug suspek sa pagpamusil kaniya.
Nasayran nga pasulod na unta ang biktima sakay sa sakyanang gimanihuan niini uban ang duha niini ka kaubanan dihang siya gipusil sa duha ka suspek nga nakamotorsiklo. Paspas usab nga misibat ang mga suspek human sa krimen samtang ang biktima gilayong gidala sa ospital.
