Polomolok, South Cotabato–Hangtud karon gidid-an gihapon ang pagsulod sa mga bisita sa buhatan sa Polomolok Municipal Police Station. Kini ang gikumpirma ni Police Captain Rommel Hitalia, Deputy Station Commander sa Polomolok PNP.
Sumala niini nga sa karon anaa pa gihapon nagpabilin sa selda sa Polomolok PNP ang mga Preso nga una nang nagpositibo sa Covid-19. Temporaryo una silang nagbutang ug lamesa sa gawas nga bahin sa Polomolok PNP alang sa mga magpa-blotter ug magreklamo.
Dugang Pagbutyag ni Police Captain Rommel Hitalia nga magadepende sa mando sa Municipal Health Office sa lungsod sa Polomolok kung kanus-a sila tugutan nga magdawat ug bisita ingon man kleyente. Sa kasamtangan wala pa silay nadawat nga mando, mao nga naghimo nalang sila ug pamaagi aron nga ma-cater gihapon ang mga tawo nga nahidangat sa ilang buhatan aron nga magpablotter o magpaabot sa ilang reklamo.
Nasayran nga una nang gipailawom sa swab test ang mga preso sa Polomolok apil na ang pipila ka mga Police diin ubay-ubay ang nagpositibo sa Covid-19.
