Ginaplastar na nga pagasugdan ang operasyon sa One Hospital Command Center (OHCC) sa Bukidnon karong umaabot Hulyo 22, 2021.
Kini ang dakong gihisgutan sa senimanang panagtigum sa Provincial Covid-19 Task Force nga gipangunahan ni Atty. Jay S. Albarece, Provincial Administrator adtong milabayng adlaw didto sa Kaamulan Open Theater, Kaamulan Grounds, Malaybalay City, Bukidnon.
Gikatahong ang maong command center gilangkuban sa 13 ka mga personahe sa pag-una sa gitumbok nga operations manager nga si Ms. Kimberly Kay I. Huiso.
Gihatag na usab ang mga hotline numbers sa maong command center alang sa mga referral patients sa covid-19 diin abli 24/7 ang serbisyo alang sa mga pasyente niini.
Sa laing bahin, gihisgutan usab sa maong session ang covid-19 cases sa probinsya, paghatag pagtagad sa mga sulat-hangyo alang sa kausaban sa quarantine classifications ug laing uban pa.
