Gikonsidera karon sa Bukidnon Provincial Police Office nga i-apil sa ilang imbestigasyon ang posibilidad nga adunay ilang gingsakpan sa sulod sa organisasyon ang ni-traydor human nga na-ambush ang convoy sa kapulisan didto sa KM 26, Tikalaan, Talakag, Bukidnon niadtong Miyerkules sa buntag.
Sa interview sa RMN ngadto kang PNP Bukidnon Provincial Director Police Colonel Ruel Lami-ing, gibutyag niini nga usa kini sa senaryong ilang gikonsidera sa karon kung wala bay leakage sa impormasyon nga naabot sa grupong New Peoples Army kon NPA hinungdan aron kini ma-ambush.
Mahinumduman nga usa ka pulis ang namatay samtang sa 3 ang samaran sa maong pagpamanhig nga binuhatan sa mga NPA.
Matud ni Col. Lami-ing nga ila kining gi-imbestigahan karon ug gisigurong manubag ang kinsa mang mamatud-an nga naghatag ug impormasyon sa pikas grupo.
Samtang wala gidali sa PNP ang pagpasaka ug kaso batok sa grupong NPA tungod kay ilang gisiguro nga adunay lig-ong nga ebidensya nga ilang ikasuporta sa ilang kaso aron mas dali nga mahatagan ug hustisya ang mga biktima.
Samtang sa pikas bahin, gikonsidera usab sa 403rd Infantry Brigade, Philippine Army ang pagbutang ug dugang check point sa lungsod sa Talakag.
Sa interview sa RMN ngadto kang Capt. Rene Belmonte, ang Civil Military Operations officer ug spokesperson sa 403rd brigade gibutyag niini nga sa karon adunay 5 ka mga detachment ang gibutang sa tibook Talakag.
