Nagpatigayon na sang orientation ang Philippine Statistics Authority (PSA) upod ang mga stakeholders angot sa Pre-Registration (Step 1) para sa implementasyon sang Philippine Identification System (PhilSys) ukon mas kilala nga National ID System sa banwa sang Lambayong, Sultan Kudarat.
Para sa subong nga tuig 2021, target sang PSA-Sultan Kudarat nga makarehistro sang 12,188 ka mga indibidwal halin sa Brgy. Poblacion kag Brgy. Tinumigues, ang duha ka mga priority barangays sa banwa sang Lambayong nga una nga mapaidalom sa nasambit nga programa.
Magadugay ang Step 1/Pre-Registration sang National ID System para sa duha ka mga nasambit nga barangay halin Enero 18 tubtob Marso 31 subong nga tuig kag pagkatapos isunod naman ang iban nga mga nabilin nga barangay sang Lambayong.
Gin-advisan naman ang mga residente sang Brgy. Poblacion kag Brgy. Tinumigues nga hulaton sa ila nga balay ang Data Collector kag ipreparar ang supporting documents kapareho sang PSA Birth certificate, Valid ID’s para sa Pre- Registration.
