Gipanghimakak ni Col. Edgardo de Leon ang Commader sa 403rd IB sa 4th Infantry Division, Philippine Army ang presensya sa mga armado sa Sitio Batinay, Barangay Tagpangi ning dakbayan.
Kini human midagsa sa covered court sa Barangay Lumbia mga alas pasado alas otso kagabie ang liboan ka residente nga gikan sa maong sitio, sentro sa Tagpangi, Pagalungan ug ubang dapit sa Lumbia human ilang nadunggan nga aduna matud pay presensya sa mga armado nga nakita sa ilang dapit.
Giklaro sa maong opisyal nga wala silay nadawat nga report alayon na sa presensya sa armado sa maong dapit ug posible matud pang kawatan ug nagpahimulos sa higayon ang nagpakatag sa maong estorya nga gika-alarma sa mga residente.
Dugang pa ni Col. de Leon nga kinahanglang sutaon una labi na sa mga Barangay officials sa maong dapit kung unsa ka tinood ang maong istorya aron dili makadalag tigaw sa mga residente.
Apan sa pikas bahin gikabutyag ni Datu Loreto Biyatak sa Sitio Batinay sa interview sa rmn news nga positibong dunay presensya sa mga armado sa maong dapit nga dugay na unta nilang gustong masayran sa kapulisan ug militar apan nabalaka sila sa ilang seguridad ug tungod sa maong hitabo kagabie andam silang mohatag og impormasyon alayon na niini.
Samtang, nagpahigayon na usab og imbestigasyon ang militar ug kapulisan sa nagpakatag sa impormasyon alayon na maong presensya sa mga armado sa dapit nga gika-alarma sa mga residente sa nasangpit nga mga barangay kagabie.
