President Rodrigo Duterte, isa ka DIKTADOR suno sang mga cause-oriented groups sa Capiz

241

Roxas City, Capiz- Isa ka protest rally ang ginpatigayon sang mga cause-oriented groups kahapon nga adlaw sa Roxas City Public Plaza. Suno sa Bayan-Capiz, ginabanta nga nagalab-ot sa 2,000 ang mga nagpasakop sa protesta kahapon nga adlaw may kaangut sa National Day of Protest kadungan sang pagdeklarar sang Martial Law ni former President Ferdinand Marcos.
Nahibaluan nga antes ang pagtililipon sang mga ini sa Roxas City Public Plaza, nagmartsa anay ang amu nga grupo sa mga dalanon sa syudad nga ginalakipan sang Kadamay, Kamaka, Tumandok, Anak pawis, Buylog-Capiz, Gabriela, Pamalakaya, Bayan-Capiz. Ginpalab-ot sang mga ini pinaagi sa protest rally kahapon nga adlaw ang ila mga hibubun-ot sa gobyerno sang Pilipinas. Pila sa mga nangin singgitan sang mga ini amo ang pagtutok sang gobyerno sa land reform programs.
Ginbatikos man sang mga ini si Presidente Rodrigo Duterte nga isa ka diktador kag makabag-o nga nawong ni Marcos. Subong man ginpakamalaot man sang grupo ang nagakatabo nga Extra Judicial Killings sa Pilipinas bangud man sa kampanya batok sa illegal nga druga sang subong nga administrasyon, paglapas sa tawhanon nga kinamatarong, indi makatarungan nga paghatag sang P1,000 nga budget sa CHR, Martial Law sa Mindanao kag madamo pa.

Facebook Comments