Sarangani Province—Giangkon ni Sir Bernardo Mayled, ang presidente sa mga senior citizen sa Maitum, Sarangani Province nga kung itandi sa nanglabay nga mga opisyales, sa panahon lang matud pa ni Governor Steve Chiongbian Solon ilang nabatyagan nga anaa ang dakong pagpangga og pagtagad kanila sa provincial government.
Sa nahitabo nga culmination program sa National Elderly Filipino Week kon Linggo ng Katandaang Pilipino sulod sa Capitol Gymnasium niaging adlaw nga Lunes kauban ang gatusan ka mga senior citizen sa pagpanguna sa provincial federation president nga si Maam Elena Perez nga taga-Glan, gibutyag ni Mayled nga mapasalamaton sila sa gibuhat nga makanunayon nga pagtutok kanila sa lokal nga gobyerno.
Walay puas sa gihapon ang Serbisyong Sarangan Community Outreach Program ni Governor Solon kauban ang mga kaubanang opisyales sa pagpanghatag og libreng hearing aid, wheelchair, mga saklay og mga reading eye glasses ngadto sa mga senior citizen. Padayon pud nga gatuyok sa mga munisipyo ang mga staff sa gobernador, lisensyado nga physical therapist, aron makapahigayon og libreng pagpanghilot gamit ang Science pinaaagi sa community-based physical therapy para sa mga na-stroke og na-paralyze.
Og bag-uhay lang, laing programa na usab alang kanila nga mao ang pagpahigayon og exercise gitawag nga Tai Chi (tai-tsi). Ang Tai Chi usa ka matang sa martial arts, apan hinay ang lihok, nga dakog ikahatag nga kaayuhan sa panglawas, pabor sa internal blood circulation og relaxation sa mga katigulangan.
