Nadakpan sa Midsayap, North Cotabato sa gilusad nga checkpoint sa kwerpo sa kapulisan ang giingong nangulo sa pagdagit ug pagpatay ni kanhi Mayor Dario Otaza, sa lungsod sa Loreto, Agusan del Sur. Giila ang suspek nga si Alder Florendo Plauta, alyas Ka Kokoy/ Ka Lope, commanding officer sa Sentro de Grabidad, Guerilla Front Committee 3, Southern Mindanao Regional Committee (SMRC) sa New Peoples’ Army (NPA).
Sa nasayran nga impormasyon sa RMN DXBC Butuan, naglusad ug checkpoint ang North Cotabato Police Provincial Office human adunay nahitabong pagpusil patay ug didto nasakoti si Plauta kinsa giingung kumander sa NPA nga nahimung gun for hire didto sa North Cotabato.
Niangkon matud pa si Plauta nga lakip siya sa mga NPA nga nibihad ug nipatay ni Mayor Otaza.
Daling natumbok ang gigikanan sa maong suspek base sa nakuhang armas niini nga naka-rehistro sa usa ka Pulis dinhi sa dakbayan sa Butuan.
Madumduman nga niadtong Oktubre 2015, gidagit sa mga NPA ug gipatay si Mayor Otaza.
Sent from my Samsung Galaxy smartphone.
