Walay angay kabalak-an ang mga mag-uuma sa Misamis Oriental tungod kay basi sa mga datus nga gihuptan sa Provincial Agricultures Office wala pay mga lungsod sa probinsya ang nagdeklarar og state of calamity.
Kini ang gipahibalo ni Provincial Agriculturist Apollo Pacamalan atol sa groundbreaking sa planta sa Oolong Tea sa Gingoog City.
Matud sa opisyal nga sa latest report nga ilang nakuha, ang lungsod sa Opol ug Alubijid ang misubmitar sa damyos sa ilang umahan diin mokabat sa 35 to 40 million pesos ang kinatibuk-ang balor sa mais ug humay ang apektado sa kainit sa panahon.
Mokabat usab sa 700 ka ektaryang luna sa umahan ang gitamnan sa mais ug humay sa maong duha ka lungsod.
Samtang, gipasabot ni Pacamalan nga nakaandam na ang mga binhi alang sa mga lugar nga gatanom na ug ang financial assistance nga ihatag sa mga mag-uumang apektado sa El Niño.
Nakaandam na matud pa ang 20 ka handpumps aron ipang apod-apod sa mga area nga nagkinahanglan sa panubig sa ilang mga umahan.
Dugang pasabot niini nga kung dunay duha o tulo ka mga lungsod ang magdeklarar og State of Calamity, hayan ayha na usab magdeklarar sa State of Calamity sa entiro Misamis Oriental ug ang Sangguniang Panlalawigan lakip na Municipal council lamang ang maka-desisyon niini.
