Sarangani Province—Libuan ka mga barangay health workers gikan sa pito ka lungsod sa Sarangani Province ang nitambong sa Provincial BHW Congress gipahigayon sulod sa Sarangani Capitol Gym nagsugod kagahapong adlawa, adlaw nga Hwebes.
Segun ni Board Member Jess Bascuña, ang chairman sa Committee on Health sa Sangguniang Panlalawigan, kauban si Vice Governor Elmer De Peralta, og mga board member sama nila Board Member Cyril Yap, Board Member George Falgui, og Board Member Rosemarie Sayo, nalipay sila sa gidaghanon sa mga BHWs nga niapil, og angayan lamang matud pa nga matag tuig magkatigum ang maong kahugpungan aron pasidunggan ang ilang mga kahago og sakripisyo, hilabi na ang paglatas-latas sa mga kabukiran og pag-adto sa mga lagyong sityo mahatag lang ang serbisyo sa maayong panglawas sa mga katawhan.
Ang mga barangay health workers ang dakog gikatabang sa pagpatuman sa health program sa Sulong Kalusugan, sama na lang sa pagbakuna sa mga kabataan sa school-based immunization, reproductive health, pagpurga kon deworming, sanitasyon, kaabag sa pagpahigayon og mga medical mission, og ang pagsanta sa mga balatian sama sa Tuberculosis, og bisan pa ang pag-abag panahon sa kalamidad og katalagman.
Si Maryjane Balera, nangulo sa board of trustee sa BHW Malungon, ang nagpadayag sa iyang pagpasalamat nga sila ang gitapok na usab sa probinsya. Subling nagpasalamat pud si Rosemarie Lariba, ang BHW president sa Glan, tungod kay sa traynta (30) katuig niini nga pagka-BHW, karon lang matud pa sa liderato ni Governor Steve Chiongbian Solon nga may ayuda sa binulang honorarium ang provincial government ngadto kanila, P500 ka pesos matag bulan.
Sa bahin ni Governor Solon, anaa matud pa sila nila Senador Manny og Congressman Ruel Pacquiao, mga mayores og mga barangay kapitanes, kanunay nga muayuda sa mga barangay health workers. Nagpaabot na lang kini karong tuiga nga mahatag na ngadto sa mga BHWs ang mga himan, sama sa stethoscope, weighing scale og BP apparatus, kadtong gipondohan sa Department of Energy og sa Southern Philippines Power Corporation. (News From: Gov. Office of Sarangani Province)
