Magapatigayon sang serye sang Mental Health Forum ang provincial government sang South Cotabato agud nga talakayon ang mga dapat himuon nga maaddress ang nagasaka sang kaso sang insidente sang suicide sa probinsya nga sang bulan sang Hunyo naglab-ot na sa masobra 30.
May-angot sini, magapatigayon ang Provincial Health Office (IPHO) South Cotabato sang Mental Health Forum for Media Partners sa Agosto 16 matapos nga ang mga katapo sang media ang masami suno pa nga “first-responders” sa tion nga may magluntad nga insidente sang suicide.
Sa nasambit nga forum diskusyunan ang Do’s and Don’t’s sa media coverage sang insidente sang suicide nga talakayon sang isa kilala nga psychiatrist sa rehiyon.
Katuyuan suno pa sini nga hibaluon ang gaps sang subong nga implementasyon sang Mental Health Programs, kag mapaintindi ang role sang media sa implementasyon sang Implementing Rules and Regulations sang RA 1036 ukon Mental Health Law.
Ginpahayag naman ni Provincial Population Officer Zenaida Duron nga isa ang ila nga opisina sa namanduan nga tutukan ang mga tikang nga himuon sa pag-address sang nasambit nga problema sa mando ni South Cotabato Governor Reynaldo Tamayo Jr.
Dugang niya pa nga kinahanglan nga magbinuligay ang tanan nga mga concern nga ahensya sang gobyerno kapareho sang Department of Health, Provincial Population Office kag iban pa nga stakeholders agud mabuligan ang pamilya nga may himata nga yara sa depression.
