May nabaton na nga mga reklamo ang director sang Negros Occidental Police Provincial Office (NOPPO) tuhoy sa gina-alegar anomaliya sa Social Amelioration Program (SAP).
Ini ang gin-confirm ni Police Colonel Romeo Baleros matapos nga ginmanduan sila sang Department of Interior and Local Government (DILG) nga imbestigaran kag arestuhon ang mga local officials nga nagapangurakot sang ayuda sang gobyerno.
Suno kay Baleros, kahapon lang nga adlaw, apat ka reklamo ang iya nabaton gikan sa Cauayan, Bago kag Talisay kag iya ginpanugyanan ang mga complainant nga magderetso sa ila local police.
Pahanumdom sang NOPPO director, personal ang pagreklamo sa police station kag dapat updan ini sang mga ebidensiya kaangay sang dokumento ukon video kag litrato agud maghulag ang imbestigasyon batok sa ginareklamo nga opisyal.
Magabulig ang NOPPO sa pagpasaka sang kaso sa Prosecutors Office kag kun luyag sang complainant nga magreklamo sang administrative, updan man nila ini sa pagpasaka sa Office of the Ombudsman.
Kun indi naman mahatagan aksyon sa local police ang reklamo, pwede malab-ot ang NOPPO Director sa iya personal number nga 0917-891-1991.
[image: image.png]
