General Santos City— Wala gikinahanglan sa dakbayan sa gensan ang usa ka opisyal nga dili kabalong mutuman sa balaud, kini ang gibutyag ni Gensan City Councilor Atty. Jeng Gacal.
Ang maong pamahayag ang alang kang Police Senior Superintendent Romeo Ruel Berango, OIC City Director sa Gensan Cioty Police Office.
Sumala niya nga kung dili kayang tumanon ni Col. Berango ang unsa mang mando kaniya sa lokal nga panggamhanan, mas maayong mupahawa nalang kini sa syudad.
Pagpaklaro niya nga sa karon, dili una siya mupasaka ug kasong paglapas sa R.A 9649 batok kang Kol. Berango gumikan dili usab niya buot nga maguba ang karera niini isip opisyal sa kapulisan.
Apan, gibutyag niya nga higayon nga magpabiling buta-bungol kini sa sayop nga operasyon sa small town lkoterry sa syudad, dili na kini muhatag pa ug kaluoy kang Col. Berango.
Nakatakda man usab siya nga mangayo ug listahan sa DILG sa mga posibleng pilian nga mahimong permanenteng city director sa GSCPO gumikan sa ginapakitang pagsupak ni Col. Berango sa balaud sa syudad.
Kahibaluan nga makapilang higayon ng gipatawag sa mga opisyal ang kapulisan gumikan sa nagpadayong operasyon sa STL sa dakbayan nga wala nananghid sa hawanan sa konseho nga gikasuko ni Kagawad Gacal.
Usa matud pa kini ka insulto sa mga balaud sa nasud ingon man sa dakbayan sa Gensan nga wala ginatuman ang balaud partikular na ang R. A 9649.
Dili man usab kumbinsido si Kagawad Gacal sa rason ni Col. Berango nga naglibog kung unsa nga balaud ang tumanom gumikan sa aduna usab kaugalingong balaud ang PCSO nga gipakita kanila.
Sa kasamtangan, nagpabilin gihapon ang operasyon sa STL luyo pa man sa ordinansang napasar sa konseho ug pinirmahan ni GenSan city Mayor Ronnel Rivera nga nagmando sa kapulisan nga ipa-undang ang operasyon sa STL.
