Roxas City, Capiz – Suspendido na ang mga public masses sa tanan nga Simbahan Katoliko sa Roxas City umpisa Agosto 18 tubtob Agosto 31, 2020 matapos ang deklarasyon nga may yara sang local transmission sang COVID-19 virus sa Barangay Culasi, Roxas City.
Bangud sini, hugot nga ginadumilian anay ang pisikal nga pag-atender sa misa sa tanan nga mga parokya kag mission stations nga sakop sang Roxas City.
Kanselado naman ang pagpatigayon sang pagbunyag, kasal kag funeral masses maluwas na lamang sa mga na-schedule na nga bunyag antes nga ginpapanaog ang circular. Apang dapat nga limitahan ang numero sang mga magatambong.
Hugot man nga ginapahanumdom sa gihapon sang Archdiocese of Capiz nga sundon sang tanan ang health protocols.
Samtang gina-enganyo man ang mga kaparian nga magsunod sa strikto nga health protocols ilabi na ang pagsuksok sang face mask, face shield kag i-obserbar ang proper hand-washing gamit ang sabon ukon alcohol.
