Ang biktima giila nga si Christian Vic Dayaba, 28 anyos, dunay kapuyo, public school teacher sa Kaatuan Elementary School, Barangay Kaatuan, Lantapan, Bukidnon, ug residente sa Purok-9, Barangay Kulasihan, Lantapan.
Nakadawat sumala pa og report ang kapulisan kabahin sa maong insidente, hinungdan nga dali kini nilang gi-operasyonan ug didto pag-abot sa lugar, naabtan ang patay’ng lawas sa maong magtutudlo nga sumala pa sakay sa iyang motorsiklo sa dihang nahitabo ang pagpamusil.
Nakahiagom og samad-pinusilan sa nagkadaiyang parte sa kalawasan ang biktima hinungdan sa hinanaling kamatayon niini.
Human sa maong krimen, misibat sa wala matino nga direksyon ang mga suspek.
Samtang narekober sa crime scene ang usa ka basyo sa kalibre 45 nga pistola ug usa ka buhing bala niini.
Blangko pa ang kapulisan sa motibo sa maong krimen apan padayong gina-imbestigahan ang maong insidente sa pagpamusil.
